При параличе
Преподобному ИАКОВУ
Железноборовскому (11 Ав.)
Преподобне и богоносне отче наш Иакове! Приими ныне нас, тебе усердно молящихся и припадающих ко всечестному и многоцелебному твоему гробу, идеже святое и многотрудное покоится тело, Духом же на небесех предстоя Святей Троице со ангелы и преподобных отец лики, молися о нас, чадех твоих, отче, да избавимся от всяких скорбей, болезней, бед и обстояний, и благочестно поживем в настоящем житии, ходяще в заповедех и оправданиих Господних безпорочно, и да явимся последовати святому и равноангельскому житию твоему. Ей, преподобне отче, молим тя, испроси нам же и всем, с верою к тебе притекающим, грехов прощение, телесем здравие, исправление жития и вечное спасение, яко да твоим предстательством спасеннии, славу возсылати сподобимся в Троице славимому Богу, Отцу и Сыну и Святому Духу, ныне и присно и во веки веков. Аминь.
Преподобному ИОАННУ Многострадальному,
Печерскому, в Ближних пещерах (18 Ил.)
Терпения столп воистинну непоколебимый и забрало от вражиих стремлений необоримо, равноангельне и многострадальне отче наш Иоанне, имуще тя, мы, недостойнии, молимся, припадающе к честным твоим мощем тепле: избави нас душетленных страстей плотских и спаси твоими молитвами.
Преподобному АЛЕКСАНДРУ Свирскому
(17 Ав., 30 Ав.)
О, священная главо, ангеле земный и человече небесный, преподобне отче наш Александре, изрядный угодниче Пресвятыя и Единосущныя Троицы, многия милости живущим во святей обители твоей и всем, с верою и любовию притекающим к тебе, являяй! Испроси нам вся к житию сему временному благопотребная, паче же к вечному спасению нашему нужная. Буди всем нам, чудотворче святый, во всякой скорби и обстоянии скорый помощник. Наипаче же в час кончины нашея явися нам заступник благосердый, да не предани будем на мытарствах воздушных власти злобнаго миродержца, но да сподобимся непреткновеннаго восхода во Царствие Небесное. Ей, отче, молитвенниче наш присный! Не посрами упования нашего, не презри смиренных молений наших, но присно о нас пред Престолом Живоначальныя Троицы предстательствуй, да сподобимся вкупе с тобою и со всеми святыми, аще и недостойни есмы, в селениих райских славити величие, благодать и милость единаго в Троице Бога, Отца, Сына и Святаго Духа, во веки веков. Аминь.
