Пророка твоего (имя) память, Господи, празднующе, тем Тя молим, спаси души наша.
Величаем тя, пророче Божий (имя), и чтем святую память твою. Ты бо молиши за нас Христа Бога нашего.
Апостоле святый (имя), моли милостиваго Бога, да прегрешений оставление подаст душам нашим.
Величаем тя Апостоле Христов (имя), и чтем болезни и труды твоя, имиже трудился еси во благовестии Христове.
Правило веры и образ кротости, воздержание учителя, яви тя стаду твоему, яже вещей истина; сего ради стяжал еси смирением высокая нищетою богатая. Отче (имя), моли Христа Бога спастися душам нашим.
Величаем тя, святителю отче (имя), и чтем святую память твою: ты бо молиши за нас Христа Бога нашего.
В тебе отче, известно спасеся* еже по образу: приим бо крест, последовал еси Христу, и дея учил еси** презирати убо плоть: преходит бо, прилежати же о души, вещи безсмертней. Темже и со Ангелы срадуется, преподобие (имя), дух твой.
* Известно спасеся - точно сохранилось.
** Дея учил еси - деятельно, самим делом учил.
Ублажаем тя, преподобне отче (имя), и чтем святую память твою, наставниче монахов и собеседниче Ангелов.
В тебе, мати, известно спасеся еже по образу: приимши бо крест, последовала еси Христу, и деющи учила еси презирати убо плоть: преходит бо, прилежати же о души, вещи безсмертней. Темже и со Ангелы срадуется, преподобная (имя), дух твой.
Ублажаем тя, преподобная мати (имя), и чтем святую память твою: ты бо молиши за нас Христа Бога нашего.
Мученик Твой, Господи, (имя) во страдании своем венец прият нетленный от Тебе, Бога нашего; имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.
Величаем тя, страстотерпче святый (имя), и чтем честная страдания твоя, яже за Христа претерпел еси.
Величаем тя, страстотерпице Христова (имя), и чтем честное страдание твое, еже за Христа претерпела еси.
Святии безсеребреницы и чудотворцы, посетите немощи наша: туне приясте, туне дадите нам.
Величаем вас, чудотворцы славнии (имена), и чтем честная страдания ваша, яже за Христа претерпели есте.