При головной боли

Пресвятой Владычице нашей Богородице
и Приснодеве Марии ради честный иконы Ея, именуемой
«ВЗЫСКАНИЕ ПОГИБШИХ» (5 Ф.)

Радуйся, Благодатная Богородице Дево, во объятиях Своих Предвечнаго Младенца и Бога носившая, проси Его дати миру умирение и душам нашим спасение. Сын ибо Тебе, Богомати, вещает, яко вся прошения твоя во благое исполнит. Сего ради и мы, припадающе, молимся и надеющиися на Тя да не погибнем, имя Твое именуем. Ты ибо еси, Владычице, Взыскание погибших.

Пророку, Предтече и Крестителю Господню
ИОАННУ (29 Ав.)

Крестителю Христов, проповедниче покаяния, кающагося не презри мене, но, совокупляйся с вои Небесными, молися ко Владыце за мене, недостойнаго, унылаго, немощнаго и печальнаго, во многия беды впадшаго, утружденнаго бурными помыслы ума моего. Аз бо есмь вертеп злых дел, отнюдь не имеяй конца греховному обычаю, пригвожден бо есть ум мой земным вещем. Что сотворю, не вем, и тебе, святый Иоанне, благодати тезоимените, яко тя пред Господем, по Богородице вем больша быти рожденных всех; ты бо сподобился еси коснутися верху Царя Христа, вземлющаго грехи мира, Агнца Божия, Егоже моли за грешную мою душу, да поне отныне, в первыйнадесять час, понесу тяготу благую и прииму мзду с последними. Eй, Крестителю Христов, честный Предтече, крайний пророче, первый во благодати мучениче, постников и пустынников наставниче, чистоты учителю и ближний друже Христов, тя молю, к тебе прибегаю, не отрини мене от твоего заступления, но возстави мя, яко падшагося многими грехи, обнови душу мою покаянием, яко вторым крещением омываяй грех, покаяние же проповедуяй во очищение коегождо от дел скверных; очисти убо мя, грехми оскверненнаго, и понуди внити, аможе ничтоже скверно входит в Царствие Небесное. Аминь.