О  ПРОЗРЕНИИ  ОСЛЕПШИХ  ОЧЕС


Пресвятой Владычице нашей Богородице и
Приснодеве Марии, ради ея иконы, именуемой
«КАЗАНСКАЯ» (8 Ил.)


Молитва

О Пресвятая Госпоже, Владычице Богородице! Со страхом, верою и любовию припадающе пред честною иконою Твоею, молим Тя: не отврати лица Твоего от прибегающих к Тебе. Умоли, милосердая Мати, Сына Твоего и Бога нашего, Господа Иисуса Христа, да сохранит мирну страну нашу, Церковь Свою Святую да незыблему соблюдет от неверия, ересей и раскола. Не имамы бо иныя помощи, не имамы иныя надежды, разве Тебе, пречистая Дево; Ты еси всесильная христиан Помощница и Заступница. Избави всех, с верою Тебе молящихся, от падений греховных, от навета злых человек, от всяких искушений, скорбей, бед и от напрасныя смерти; даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси благодарне воспевающе величия Твоя, сподобимся Небеснаго Царствия и тамо со всеми святыми прославим пречестное и великолепное Имя Отца, и Сына, и Святаго Духа. Аминь.


Святителю НИКИТЕ, затворнику Печерскому,
епископу Новгородскому (31 Ян.)

Молитва

О архиерею Божий, святителю Никито, услыши нас, грешных раб твоих, стекшихся днесь в священный храм сей, молящихся тебе и к священной твоей раце притекающих и умиленно вопиющих: якоже седя на престоле святительства в Великом Новеграде сем, и единою надлежащею бездождию дождь молитвами свел еси и паки граду сему, огненным пламенем обшедшему, молитвою пламень огненный угасил еси, и ныне молим тя, о святителю Христов Никито, молися ко Господу, еже избавити Великий Новград сей и вся грады и страны христианския от труса, потопа, глада, огня, града, меча и от всех врагов, видимых и невидимых. Яко да избранных молитв твоих ради спасаеми, славим Пресвятую Троицу, Отца и Сына и Святаго Духа, и твое милостивное предстательство ныне и присно и во веки веков. Аминь.


Великомученику Димитрию
Солунскому (26 Окт.)

Молитва

Святый и славный великомучениче Христов Димитрие, скорый помощниче и теплый заступниче с верою притекающих к тебе! Предстоя с дерзновением Небесному Царю, испроси у Него прощение согрешений наших, и о еже избавитися нам от всегубительныя язвы, труса, потопа, огня, меча и вечныя казни. Моли благость Его, еже ущедрити святую обитель сию, всякий град и всякую страну христианскую. Исходатайствуй нам у Царя царствующих победу на враги видимыя и невидимыя, стране нашей мир, тишину, твердость в вере и преспеяние во благочестии: нам же, чтущим честную память твою, испроси благодатное укрепление надела благая, да благоугодное Владыце нашему Христу Богу зде творяще, сподобимся молитвами твоими наследовати Царствие Небесное для вечного прославления Его со Отцем и Святым Духом. Аминь.

 
Твоя Йога
на первую страницу